తిరుమల: తిరుమలలోని క్రమశిక్షణతో కూడిన, పారదర్శకమైన ఆలయ నిర్వహణ దేశంలోని ఇతర దేవాలయాలకు స్ఫూర్తిదాయకమని ముఖ్యమంత్రి నారా చంద్రబాబు నాయుడు అన్నారు. శ్రీవారి సాలకట్ల బ్రహ్మోత్సవాల సందర్భంగా మంగళవారం రాష్ట్ర ప్రభుత్వం తరఫున ఆయన శ్రీవేంకటేశ్వరస్వామివారికి పట్టువస్త్రాలు సమర్పించారు.
కుటుంబ సమేతంగా తిరుమలకు చేరుకున్న చంద్రబాబు.. ముందుగా బేడీ ఆంజనేయస్వామి ఆలయంలో ప్రత్యేక పూజలు నిర్వహించారు. అనంతరం మంగళ వాయిద్యాల నడుమ పట్టువస్త్రాలను శిరస్సుపై ఉంచుకుని శ్రీవారి ఆలయానికి చేరుకున్నారు. అక్కడ స్వామివారికి పట్టువస్త్రాలు సమర్పించి దర్శనం చేసుకున్నారు.
దర్శనం అనంతరం ఆలయ పండితులు ముఖ్యమంత్రి చంద్రబాబుతో పాటు ఆయన కుటుంబ సభ్యులకు వేదాశీర్వచనాలు అందించారు. టీటీడీ అధికారులు శ్రీవారి తీర్థప్రసాదాలను అందజేశారు.
రాష్ట్రం సుభిక్షంగా ఉండాలని ప్రార్థన
ఈ సందర్భంగా చంద్రబాబు మాట్లాడుతూ.. రాష్ట్రంలో పుష్కలంగా వర్షాలు కురిసి ప్రజలందరూ ఆయురారోగ్యాలతో, సుఖసంతోషాలతో ఉండాలని శ్రీవారిని ప్రార్థించినట్లు తెలిపారు. ఆంధ్రప్రదేశ్ దేశంలోనే అత్యుత్తమ రాష్ట్రంగా, భారత్ ప్రపంచంలో అగ్రగామిగా నిలవాలని కోరుకున్నట్లు చెప్పారు.
శ్రీవారికి పట్టువస్త్రాలు సమర్పించే పవిత్ర కార్యం తన అదృష్టమని చంద్రబాబు పేర్కొన్నారు.
టీటీడీ నిర్వహణపై ప్రశంసలు
ప్రపంచవ్యాప్తంగా కోట్లాది మంది హిందువులకు కలియుగ దైవం శ్రీవేంకటేశ్వరస్వామిపై అపారమైన విశ్వాసం ఉందని సీఎం అన్నారు. దేశ, విదేశాల్లోని హిందువులు జీవితంలో ఒక్కసారైనా శ్రీవారిని దర్శించుకోవాలని కోరుకుంటారని తెలిపారు.
ఇంతటి ప్రాముఖ్యత కలిగిన తిరుమల ఆలయాన్ని చక్కగా నిర్వహిస్తున్న టీటీడీ పాలకమండలి, అధికారులను చంద్రబాబు అభినందించారు. శ్రీవారి దర్శనానికి వచ్చే భక్తులకు ఎలాంటి అసౌకర్యం కలగకుండా చూడాల్సిన బాధ్యత అధికారులపై ఉందని సూచించారు.
తిరుమల గొప్ప సంప్రదాయాలు, సంస్కృతిని భావితరాలకు అందించేలా ప్రతి ఒక్కరూ కృషి చేయాలని పిలుపునిచ్చారు.
ఈ కార్యక్రమంలో మంత్రులు నారా లోకేశ్, ఆనం రామనారాయణరెడ్డి, అనగాని సత్యప్రసాద్, టీటీడీ ఛైర్మన్ బీఆర్ నాయుడు, ఈవో ముద్దాడ రవిచంద్రతో పాటు ఇతర బోర్డు సభ్యులు పాల్గొన్నారు.
