హైదరాబాద్: మాజీ మంత్రి, బీఆర్ఎస్ ఎమ్మెల్యే హరీశ్రావుపై తెలంగాణ రెవెన్యూ మంత్రి పొంగులేటి శ్రీనివాస్రెడ్డి మరోసారి విమర్శలు చేశారు. అసైన్డ్ భూముల రిజిస్ట్రేషన్కు ఏ ప్రభుత్వం అనుమతి ఇచ్చినా అది తప్పేనని పేర్కొన్న ఆయన.. అలాంటప్పుడు తన మామ భూముల విషయంలో రిజిస్ట్రేషన్ ఎలా జరిగిందని హరీశ్రావును ప్రశ్నించారు. ‘‘అప్పుడు నీ బుద్ధి ఎక్కడికి పోయింది?’’ అంటూ వ్యాఖ్యానించారు.
అసెంబ్లీ లాబీలో మీడియాతో ఇష్టాగోష్టిగా మాట్లాడిన పొంగులేటి.. తన మామ భూములకు గత కాంగ్రెస్ ప్రభుత్వమే ఎన్ఓసీ ఇచ్చిందన్న హరీశ్రావు వ్యాఖ్యలపై స్పందించారు. అసైన్డ్ భూములకు అనుమతి ఇవ్వడం చట్టబద్ధం కాదని, ఏ ప్రభుత్వం అలా చేసినా అది తప్పేనని అన్నారు. ఈ విషయం హరీశ్రావుకు తెలియదా? అని ప్రశ్నించారు.
పల్లా, గంగులపైనా ఆరోపణలు
బీఆర్ఎస్ ఎమ్మెల్యే పల్లా రాజేశ్వర్రెడ్డి భూదాన్ భూమిని నకిలీ ఎన్ఓసీతో రిజిస్ట్రేషన్ చేయించుకున్నారని పొంగులేటి ఆరోపించారు. అలాంటి రిజిస్ట్రేషన్ కూడా తప్పేనని అన్నారు.
మాజీ మంత్రి గంగుల కమలాకర్ విషయంలోనూ నిషేధిత భూమి రిజిస్ట్రేషన్ జరిగిందని ఆరోపించారు. హైకోర్టు, సుప్రీంకోర్టుల్లో స్టేటస్కో ఉత్తర్వులు ఉన్నప్పటికీ రిజిస్ట్రేషన్ చేయించుకున్నారని పొంగులేటి పేర్కొన్నారు. ప్రభుత్వ భూమిని ఏ ప్రభుత్వం రిజిస్ట్రేషన్ చేసినా అది తప్పేనని స్పష్టం చేశారు.
22-A జాబితాపై కీలక గణాంకాలు
22-A నిషేధిత భూముల జాబితాపైనా పొంగులేటి వివరాలు వెల్లడించారు. కాంగ్రెస్ ప్రభుత్వం అధికారంలోకి వచ్చినప్పుడు 22-A కింద మొత్తం 1,02,52,690 ఎకరాలు ఉన్నాయని, 2026 ఆగస్టు 31 నాటికి ఆ విస్తీర్ణం 1,02,05,250 ఎకరాలకు తగ్గిందని ఆయన అసెంబ్లీలో తెలిపారు. అంటే మొత్తం 47,440 ఎకరాల తగ్గుదల నమోదైందని చెప్పారు.
తాజా గణాంకాల ప్రకారం 22-A జాబితాలోని ప్రైవేట్ భూముల విస్తీర్ణం సుమారు 3.74 లక్షల ఎకరాలుగా ఉందని పొంగులేటి అసెంబ్లీలో వివరించారు.
గత ప్రభుత్వ హయాంలో చోటుచేసుకున్న భూ వ్యవహారాలపై మరిన్ని వివరాలను త్వరలో వెల్లడిస్తామని మంత్రి తెలిపారు. 22-A భూముల అంశంపై ప్రభుత్వం త్వరలో కీలక నిర్ణయాలు తీసుకోనుందని చెప్పారు.
ఇదిలా ఉండగా, 22-A జాబితాపై హరీశ్రావు కూడా ప్రభుత్వంపై విమర్శలు చేస్తూ, జాబితా తయారీపై న్యాయ విచారణ కోరారు. దీంతో ఈ అంశంపై అధికార, ప్రతిపక్షాల మధ్య రాజకీయ వివాదం కొనసాగుతోంది.
